Þjóðlegu hljóðækurnar eru margar og hér er bara brot af úrvalinu

Sumarið er tíminn, einsog söngvaskáldið söng hér áður og fyrrum, meira annars hve algengt er að vitna í skáld í skrifum. Já nú eru margir á ferð og flugi enda veðrið til þess sól og sumar og bara gaman. Það er löngu vitað að einn skemmtilegasti ferðafélaginn er hljóðbókin. Fátt er betra en að hlýða á góða sögu meðan ekið eða ferðast er um okkar fallega land. Hvað þá þegar um er að ræða okkar þjóðlega fróðleik og gullnámu gömlu góðu þjóðsögurnar. Kómedíuleikhúsið hefur gefið út tíu Þjóðlegar hljóðbækur sem allar innihalda mangaðar þjóðsögur. Þjóðlegu hljóðbækurnar fást hér á heimasíðunn og einnig á útsölustöðum um land allt.

Taktu ferðalagið alla leið og hafðu með þér Þjóðlega hljóðbók í ferðalagið. 

Úr sýningunni okkar Skrímsli sem var sett upp fyrir nokkrum árum

Skrímsli hafa sannarlega verið ,,inni" einsog nútímamaðurinn segir þegar eitthvað er í tísku. Ætli þetta æði hafi ekki byrjað með Skrímsli ehf frá Disney samsteypunni. Hér á landi hafa bækur um skrímsli notið mikilla vinsælda undanfarin ár og meira að segja hefur verið opnað sérstakt skrímslasafn á Bíldudal en Arnarfjörður ku vera mekka skrímsla á Íslandi.

Gömlu góðu íslensku þjóðsögurnar geyma stórkostlegan sjóð af krassandi skrímslasögum. Nú höfum við safnað saman úrvali af þessum sögnum og lesið inná hljóðbók sem er væntanleg núna í júní. Sögurnar eru sóttar í hin ýmsu þjóðsagnasöfn og þá einkum frá þeim meisturum Jóni Árnasyni og Sigfúsi Sigfússyni. Víst eru skrímslin fjölbreytt einsog mannfólkið en flest koma þau úr sjó og vötnum. Á hljóðbókinnni Skrímslasögur eru margar magnaðar sögur af skrímslum má þar nefna Lagarfljótsorminn og Krosseyrarskrímslið. 

Hljóðbókin Skrímslasögur kemur út um og eftir Þjóðhátíðardag og mun fást hér á heimasíðunn sem og í verslunum um land allt. 

Sýnt var í gamlli norskri hlöðu

Kómedíuleikhúsið er rétt komið aftur vestur til síns heima eftir einstaka og sérlega vel heppnaða leikferð til Noregs. Var þetta um margt með merkilegri leikferðum sem Kómedían hefur farið og hafa þó nokkrar sögulegar ferðir verið farnar t.d. til Albaníu. Að þessu sinni var farið til Súrnadals heimahérað aðalpersónu vors vinsælasta leiks nefnilega Gísli Súrsson. Það var í Súrnadal í Noregi sem kappinn Gísli sleit sínum bernskuskóm og gerði reyndar aðeins meira en það því hann varð að flýja land eftir átök í Súrnadal og fór þá til Íslands nánar til tekið í Haukadal í Dýrafirði. Þar er alveg ljóst að Gísli var smekkmaður góður því Súrnadalur er stórfagur rétt einsog Haukadalur og Geirþjófsfjörður þar sem Gísli átti bækistöð á sínum frækna flótta. 

Verðlaunaleikurinn Gísli Súrsson var sýndur þrívegis í Súrnadal í Noregi. Aldursbil áhorfenda var í raun allur skalinn því tvær sýningar voru fyrir framtíð Súrnadals, nemendur skólana, og svo var ein almenn sýning. Íbúar Súrnadals hafa lang flestir heyrt af sínum fræga syni Gísla Súrssyni en fæstir þekktu þó söguna til hlýtar. Vissu jú að hann væri frá Súrnadal og að hann hafi orðið að flýja land sökum átaka í dalnum. Þá hafi hann farið til Íslands og ekki var það nú mikið meira sem Súrdælir vissu. Hinsvegar voru allir mjög áhugasamir um að heyra af þessum kappa og það er náttúrulega bara alveg frábært. Svona getur nú leikhúsið verið mikilvægt í samtíma vorum og átt þátt í að kynna meira en þúsund ára sögu fyrir nútímamanninum og það í Noregi. En segir ekki einhversstaðar að ,,öll veröldin sé leiksvið"? 

Móttökur í Súrnadal voru alveg frábærar á allan hátt og eru Súrdælir hinir bestu gestgjafar. Slíkur var áhuginn að sýningum loknum að það kæmi okkur ekki á óvart að þess verði skammt að bíða að til Vestfjarða komi góðir gestir úr Súrnadal. Erindið jú að ganga á slóðir syni Súrnadals Gísla nokkurs Súrssonar. 

Með þessari alls ekki súru frétt eru myndir frá ferð okkar til Súrnadals. 

Ásthildur Sturludóttir bæjarstjóri Vesturbyggðar og Elfar Logi Hannesson leikhússtjóri munda pennana á Patró

Það var sannarlega kómískur dagur á laugardag, 11. maí, á Patreksfirði og mikið um að vera. Þá var undirritaður verkefnasamningur milli Kómedíuleikhússins og Vesturbyggðar. Samningurinn felst í því að á árinu mun Vestubyggð versla af Kómedíuleikhúsinu þrjú verkefni til handa íbúum Vesturbyggðar. Verkefnin eru ein leiksýning fyrir leikskólabörn Vesturbyggðar, ein sýning fyrir grunnskólanema Vesturbyggðar og loks ein menningaruppákoma fyrir eldri/heldri borgara Vesturbyggðar. Þetta er sannarlega ánægjulegt og sérlega finnst okkur skemmtilegt að fá að koma svona oft í þessa byggð sem sannarlega er í miklum vexti og almennt bjart yfir byggðinni sem og íbúum Vesturbyggðar.

Þetta er þriðji verkefnasamningurinn sem Kómedíuleikhúsið gerir við sveitarfélög á Vestfjörðum. Um daginn var gerður samningur við Súðavík en það var Ísafjarðarbær sem reið á vaðið og hefur sá samingur verið í gangi í nokkur ár. Loks má geta þess að Kómedíuleikhúsið er að ræða við fleiri sveitarfélög um listrænan verkefnasamning, ekki bara á Vestfjörðum heldur og víðar um landið. Svo nú krossum við bara fingur og vonumst til að geta stungið pennan niður víðar á næstu misserum. 

Loksins kemst Gísli aftur heim

Verðlaunaleikurinn Gísli Súrsson hefur farið víða frá því leikurinn var frumsýndur árið 2005. Um allt Ísland fyrir vestan, austan, norðan og sunnan. Um Evrópu í Albaníu, Luxemburg og tvívegis í Þýskalandi. Enn er sýningin í landvinningum því í vikunni bætist Noregur í sýningarbókhald Gísla Súrssonar. Ekki nóg með það heldur er í raun verið að fara með Gísla heim því sýnt verður í hans fæðingarbæ nefnilega Súrnadal í Noregi. 

Árlega er haldin mikil menningarveisla í Súrnadal í Noregi sem nefnist Varsöghelga. Þar er boðið uppá menningu og listir alla daga. Leikritið um Gísla Súrsson verður sýnt tvívegis á þessari hátíð sem fram fer í þessari viku. Einnig verða sýnd brot og kynningar á leikverkinu á hátíðinni. Það verður sannarlega gaman að sýna þessa einstöku sýningu okkar í heimahögum sögupersónunnar. Nú eigum við bara eftir að sýna í Hergilsey þá höfum við sýnt Gísla á öllum helstu sögustöðum þess Súra. 

Leikritið hefur sannarlega fengið dúndur góðar viðtökur og aðsókn

Nýjasta leikverk Kómedíuleikhússins Sigvaldi Kaldalóns hefur fengið stókostlegar viðtökur. Upphaflega átti bara að sýna 2-3 sýningar en það styttist brátt í tuginn í sýningarfjölda og meira framundan. Enn á ný leggjum við land undir fót og nú tökum við ekki hús einsog við erum vön heldur heilt safn undir okkur. Á fimmtudag 9. maí, Uppstingingardag, verður leikritið Sigvaldi Kaldalóns sýnt í hinu einstaka Vatnasafni í Stykkishólmi. Sýningin hefst kl.20 og er miðasala á staðnum. 

Höfundur og leikari sýningarinnar Sigvaldi Kaldalóns er Elfar Logi Hannesson. Aldrei þessu vant er hann ekki einn á senunni því með honum er hin hæfileikaríka tónlistarskona Dagný Arnalds sem gerir allt í senn leikur, syngur og spilar á klaverið alveg einsog engill. Leikurinn var frumsýndur í Hömrum í lok febrúar og sýndur þar fyrir smekkfullu húsi fimm sinnum. Eftir það hafa sýningar verið bæði á Þingeyri og í Saurbæ, á hinni árlegu Jörfagleði í Dölunum. Sýningin á Sigvalda Kaldalóns í Vatnasafninu í Stykkishólmi núna á fimmtudag er sú áttunda. Í sumar verður svo farið á söguslóðir verksins þegar sýnt verður í Dalbæ á Snæfjallaströnd í byrjun júlí. Skömmu síðar verður Sigvaldi Kaldalóns á dagskrá hinnar vönduðu og vinsælu Þjóðlagahátíðar á Siglufirði. Ekki er allt talið en við hættum samt að telja hér og komum með fleiri fréttir af sýningunni Sigvaldi Kaldalóns síðar. 

Leiksýningin Sigvaldi Kaldalóns hefur fengið fanta fínar viðtökur áhorfenda

Hin vinsæla sýning Sigvaldi Kaldalóns verður sýnd á Jörfagleði í dag, síðasta vetrardag. Sýnt verður í félagsheimilinu Tjarnarlundi í Saurbæ og hefst sýningin kl.20.30. Boðið verður uppá súpu og kaffi með sýningunni. Miðaverð er aðeins 3.000.- kr og 1.500.kr fyrir börn á grunnskólaaldri. Að sýningu lokinni mun leikarinn Elfar Logi fjalla um ár Sigvalda Kaldalóns í Flatey en þar bjó hann og starfaði í þrjú ár. 

Leikritið um Sigvalda Kaldalóns var frumsýnt í lok febrúar á þessu ári og hefur verið sýnt oftsinnis við svo gott sem fullt hús í hvert sinn. Framundan eru svo sýningar á leiknum hér og þar um landið.

Sigvaldi Kaldalóns fjallar um ár dokorsins og tónskáldsins við Djúp. En þar dvaldi hann í rúman áratug og starfaði í einu afskekktasta og erfiðasta læknishéraði landsins í Nauteyrarhéraði. Þrátt fyrir það átti hann góðar stundir í Djúpinu þar hófst tónskáldaferill hann fyrir alvöru og á þessum tíma samdi hann ein 100 lög. 

Höfundur og leikari sýningarinnar er Elfar Logi Hannesson og með honum á sviðinu er tónlistarkonan Dagný Arnalds sem sér um tónlist og söng í sýningunni. 

Búkolla og Gísli Súrsson fara norður

Allt frá aldamótum hefur Kómedíuleikhúsið verið meðal ferðaglöðustu leikhúsum þjóðarinnar. Við höfum líka sérstaka ánægju af því að ferðast um okkar fagra land og hitta áhorfendur í sínu eigin leikhúsi. Í næstu viku verður enn ein leikferðin farin og nú er stefnan tekinn norður. 

Vikuna 15. - 20. apríl munum við heimsækja skóla á Norðurlandi bæði leik- og grunnskóla. Það eru góðkunningjar Kómedíu sem verða í aðalhlutverki. Fyrst ber að nefna vinsælustu sýningu okkar sem og Vestfjarða sjálfan Gísla Súrsson. Með fornkappanum verður sýningin Búkolla sem hefur sannarlega slegið í gegn og verið sýnd um land allt. Þegar hafa nokkrir skólar bókað sýningar en enn getum við bætt við okkur.

Það er auðvelt að panta sýningu einfaldlega senda okkur tölvuöpóst á komedia@komedia.is Einnig er hægt að hringja í Kómedíusímann 891 7025. Hlökkum til að heyra í ykkur og enn meira að sjá ykkur í leikhúsinu. 

Elfar Logi og Dagný Arnalds hafa snert strengi í hugum áhorfenda

Leikritið vinsæla og ástsæla Sigvaldi Kaldalóns verður sýnt á Þingeyri um helgina. Sýnt verður í hinu frábæra félagsheimili staðarins á sunnudag 7. april kl.17. Miðasala á staðnum á sýningardag einnig er hægt að panta miða strax í dag í síma 891 7025. Leikritið um Sigvalda Kaldalóns hefur verið sýnt í Hömrum Ísafirði og hefur verið fullt á svo gott sem allar sýningar. Nú liggur leiðin á Þingeyri og fleiri sýningar eru á döfinni um landið m.a. í Saurbæ, Stykkishólmi og í Dalbæ á Snæfjallaströnd.

Það eru þau Elfar Logi Hannesson og Dagný Arnalds sem leika, spila og syngja í þessari rómuðu sýningu um Sigvalda Kaldalóns. Verkið fjallar um ár Sigvalda þegar hann starfaði sem læknir í Ísafjarðardjúpi. Þar gerðist margt sögulegt og víst var tónskáldið Sigvaldi í essinu sínu og allar götur síðan minntist hann þessa tíma með ást og söknuði. Fjölmörg lög eru flutt í sýningunni. 

Sigvaldi Kaldalóns verður tvívegis á fjölunum

Það verður lítið um páskafrí hjá Kómedíuleikhúsinu enda ekki ástæða til fullur bær af fólki og framundan hin árlega Skíðavíka á Ísafirði. Fjörið verður kómískt að hætti hússins því föstudagurinn langi verður tekinn mjög bókstaflega og mun verða langi leikhúsdagurinn hjá okkur. Alls verða sýndar þrjár sýningar á föstudaginn langa í Hömrum, sal Tónlistarskóla Ísafjarðar. Fjörið hefst með hinni vinsælu og ævintýralegu leiksýningu Búkolla - Ævintýraheimur Muggs kl.14. Þremur tímum síðar kl.17 verður hin ástsæla sýning Sigvaldi Kaldalóns á fjölunum. Sýningin um Sigvalda verður síðan sýnd aftur kl.20 á föstudaginn langa. Og slær þar með botninn í hinn langa kómíska leikhúsdag. 

Miðasala á allar sýningar eru löngu hafin og stendur yfir í Vestfirzku verzluninni á Ísafirði. Einnig er hægt að panta miða í miðasölusíma Kómedíuleikhússins 891 7025.