Sýnt í Listakaupstað Ísafirði, gengið inn Tangagötumegin

Forsala í Vestfirzku verzluninni - Miðasölusími: 891 7025 Miðaverð: 1.900. - kr

Frumsýning: Lau. 26. nóv. kl.14

2. sýning:    Sun. 27. nóv. kl.14

3. sýning:    Lau. 3.  des. kl.14

4. sýning:    Sun. 4.  des. kl.14

5. sýning:    Lau. 10. des. kl.14

6. sýning:    Sun. 11. des. kl.14

7. sýning:    Lau. 17. des. kl.14

8. sýning:    Sun. 18. des. kl.14

9. sýning:    Fös. 30. des. kl.14

Tífill, Tútur, Baggi, Lútur,

Rauður, Redda, Steingrímur, Sledda,

Lækjaræsir, Bjálminn sjálfur, Bjálfansbarnið,

Litlipungur, Örvadrumbur

Þessi merkilegi hópur er í flokki vestfirsku jólasveinanna en þeir eru fleiri. Allir þekkja jólasveinana 13 sem hafa verið á ferli síðustu aldir. Færri þekkja hinsvegar Bjálfansbarnið og bræður hans enda hafa þeir ekki sést meðal manna í hundrað ár eða meira. Þetta eru sannkallaðir jólasveinar einsog nöfn þeirra gefa til kynna og nú loksins koma þeir aftur til byggða. Eitt er víst þetta verður sögulegt og ævintýralegt og hver veit nema jólakötturinn skottist með. Einstakt og ævintýralegt jólaleikrit fyrir alla fjölskylduna.

Höfundur/Leikari: Elfar Logi Hannesson

Höfundur jólasveinakvæða: Þórarinn Hannesson

Búningar/Leikmynd/Grímur: Marsibil G. Kristjánsdóttir

Leikstjórn: Ársæll Níelsson

Frumsýnt í Félagsheimilinu Suðureyri í mars 2012

Sýnt fyrir hópa um land allt

Ég þekki mann sem er þannig: Hann er tæpir 70 þumlungar á hæð, en heldur mjór eftir hæðinni og fremur mittismjór; skrefhár; hálslangur í meðallagi; munnfríður. Nokkuð brúna mikill, með bjartar augnabrýr, gráeygður, en augun fögur, ljúf og skær. Svipfagur er hann, góðmannlegur og ljúfmannlegur, og elskulegur í dagfari sífellt ljúfur og blíður og kurteis; getur manna best ráðið við geð sitt, en er þó stundum snöggbráður. All-mikið hneigður til kvenna er hann, en ekki kemur það mikið í ljós. Með léttustu mönnum er hann til gangs, og skjótur í öllum hreifingum og þollítill, sem stafar af heilsuleysi hans. Maður þessi er: Magnús Hjaltason, er ritar sig; Magnús Hj. Magnússon.

Alþýðuskáldið Magnús Hj. Magnússon eða Skáldið á Þröm einsog hann er oft nefndur lifði engu venjulegu lífi og sjaldan var það neitt dans á rósum. Skáldið er fyrirmyndin af Ólafi Kárasyni í Heimsljósi Laxness.

Höfundar: Ársæll Níelsson, Elfar Logi Hannesson

Leikari: Ársæll Níelsson

Búningar/Leikmynd: Marsibil G. Kristjánsdóttir

Tónlist: Jóhann Friðgeir Jóhannesson

Leikstjórn: Elfar Logi Hannesson

Frumsýnt í kirkju Samúels í Arnarfirði í júní 2012

Sýnt fyrir hópa um land allt

Einhver merkasti sögustaður Vestfjarða er án efa Selárdalur í Arnarfirði. Í dag er staðurinn einkum þekktur fyrir verk alþýðulistamannsins Samúels Jónssonar eða Listamannsins með barnshjartað einsog hann er jafnan nefndur. Segja má að sannkölluð ævintýraveröld opnist þegar komið er í Selárdal sem skákar öllum Disneylöndum, slíkir eru töfrarnir. Listamaðurinn með barnshjartað var fjölhæfur með eindæmum hann málaði myndir, smíðaði kistla og skápa, reisti styttur, ljónagosbrunn og síðast en ekki síst eitt stykki kirkju.

Í þessu verki verður fjallað um Listamanninn með barnshjartað er bjó í Selárdal og þar byggði hann sína eigin ævintýraveröld sem enn stendur og laðar að fleiri þúsund manns árlega. Leikurinn verður frumsýndur á söguslóðum í kirkju Samúels en hópar geta pantað sýninguna sérstaklega bæði í Selárdal og um land allt.

Höfundar: Ársæll Níelsson, Elfar Logi Hannesson

Leikari: Elfar Logi Hannesson

Búningar/Leikmynd: Marsibil G. Kristjánsdóttir

Leikstjórn: Ársæll Níelsson

« 1 af 3 »

Bjarni á Fönix

Sýnt fyrir hópa allt árið um kring

Leikurinn hefur verið sýndur um land allt og einnig í Danmörku við frábærar undirtektir. Enda er hér að ræða um kraftmikla sýningu sem lætur engan ósnortinn. Skipherrann Bjarni Þorlaugarson af skútunni Fönix háði frækinn bardaga við hátt í 30 Fransmenn um miðja nítjándu öld. Bardaginn stóð í fjóra klukkutíma, að vísu tóku menn sér pásu í miðjum átökum. Skömmu síðar fannst sjórekið lík af einum Fransmanni og voru uppi kenningar um að Bjarni hafi orðið hans bani. Mál var dómtekið og þurfti Bjarni þá að spyrja sig þeirrar samviskuspurningar: Drap ég mann eða drap ég ekki mann?

Höfundar: Ársæll Níelsson, Elfar Logi Hannesson

Leikari: Ársæll Níelsson

Búningar/Leikmynd: Marsibil G. Kristjánsdóttir

Leikstjórn: Elfar Logi Hannesson

Gísli Súrsson

Sýnt fyrir hópa árið um kring bæði á íslensku og eða ensku

Vinsælasta leikrit Vestfjarða hefur verið sýnt um 250 sinnum bæði hér heima og víða erlendis. Leikurinn segir af örlögum Gísla Súrssonar og fjölskyldu hans sem taka land í Haukadal í Dýrafirði. Gengur þeim allt í haginn í fyrstu og gjörast brátt hinir mestu höfðingjar. En skjótt skipast veður í lofti og brátt er farið að fella mann og annan. Þetta endar loks með því að Gísli er útlægur ger.

Höfundar: Elfar Logi Hannesson, Jón Stefán Kristjánsson

Leikari: Elfar Logi Hannesson

Leikstjórn: Jón Stefán Kristjánsson

Verðlaun: Leiklistarhátíðin Integra Hannover Þýskalandi - Besta handrit. Leiklistarhátíðin Albamono Korce Albaníu - Besta sýningin.

Jón Sigurðsson strákur að vestan

Sýnt fyrir hópa um land allt árið um kring

Leikurinn hefur verið sýndur um land allt og einnig í Kaupmannahöfn í Danmörku við fanta góða viðtökur. Sómi Íslands sverð og skjöldur. Frelsishetjuna Jón Sigurðsson frá Hrafnseyri í Arnarfirði þekkja allir og þá einkum afrek hans í Danaveldi. En hver var Jón Sigurðsson og hvaðan kom hann? Hvað var það sem mótaði hann og gerði hann að öflugum talsmanni þjóðarinnar? Í þessu verki fáum við að kynnast piltinum Jóni Sigurðssyni, æskuárunum og tímanum áður en hann settist að í Kaupmannahöfn.

Höfundur/Leikari: Elfar Logi Hannesson

Búningar/Leikmynd: Marsibil G. Kristjánsdóttir

Leikstjórn: Ársæll Níelsson