Kómedíuleikhúsið frumsýnir brakandi ferskan og nýjan einleik, EG, miðvikudaginn 23. maí. Um er að ræða verk um hinn einstaka athafnamann Einar Guðfinnsson í Bolungarvík. Sýnt verður á söguslóðum eða í Einarshúsi í Bolungarvík. Nú þegar er orðið uppselt á frumsýninguna. En miðasala er í blússandi gangi á 2. sýningu sem verður fimmtudaginn 24. maí og einnig á 3. sýningu sunnudaginn 27. maí kl.16.00. Miðasala fer fram í Einarshúsi Bolungarvík. Miðasölusíminn er 456 7901.

EG er einstakur einleikur um athafnamanninn og föður Bolungavíkur Einar Guðfinnsson. Ungur að árum hóf Einar útgerð á sexæringi. Hugurinn hans stefndi hátt og áður en yfir lauk hafði hann byggt upp mörg fyrirtæki í útgerð og margþættum rekstri. Hér er á ferðinni kraftmikil leiksýning þar sem róið er á ýmis mið og gjarnan teflt á tæpasta vað.

Höfundar leiksins eru þeir Elfar Logi Hannesson og Rúnar Guðbrandsson. Sá fyrrnefndi er í hlutverki Einars en Rúnar leikstýrir. Höfundar tónlistar er Björn Thoroddsen en lýsingu hannaði Magnús Arnar Sigurðsson. Það er hið vestfirska Kómedíuleikhús sem setur EG á senu.