Æfingar eru hafnar á nýju íslensku leikverki, Síðasti dagur Sveins skotta, en verkið verður frumsýnt í Edinborgarhúsinu á Ísafirði fimmtudaginn 18. mars. Miðasala hefst föstudaginn 12. mars í síma: 450 5565. Að verkinu standa Kómedíuleikhúsið á Ísafirði og Lýðveldisleikhúsið í Reykjavík en það er ljóðleikur eða söngdans um Svein Björnsson þjóf, nauðgara og galdramann sem var hengdur í Rauðuskörðum á Barðaströnd 1648. Sveinn þessi var enn í móðurkviði þegar faðir hans Axlar-Björn var tekinn af lífi fyrir morðverk sín.

Síðasti dagur Sveins skotta er svört kómedía þar sem jafngild eru leiklist, tónlist og dans. Leikurinn gerist á síðasta ævidegi Sveins þar sem hann bíður aftöku sinnar og rifjar upp líf sitt og ástæður þess að svona er komið fyrir honum. Konur hafa verið hans örlagavaldar, fyrst móðir hans sem gerði honum í móðurkviði að hefna föður síns, síðan fórnarlömb hans og að lokum konan sem leikur á hann og hefur hann undir.

Helstu höfundar og flytjendur verksins eru: Benóný Ægisson höfundur handrits og tónlistar, Elfar Logi Hannesson leikari og leikstjóri, Halldóra Malín Pétursdóttir leik- og söngkona, Henna Riikka Nurmi höfundur sviðshreyfinga, leikari og dansari, Steingrímur Guðmundsson höfundur tónlistar og hljóðfæraleikari og Ársæll Níelsson leikari. Marsibil G. Kristjánsdóttir sér um leikmynd og búninga.

Uppsetning verksins er styrkt af menningarráði Vestfjarða og fyrirtækjum á Ísafirði sem eru vinveitt listum og menningu. Eftir að verkið hefur verið sýnt á Ísafirði verður það sýnt í Reykjavík og víðar um landið.

» meira

Kómedíuleikhúsið sýnir hápólitíska gamanleikinn Heilsugæslan á Egisstöðum um helgina. Sýnt verður í Sláturhúsinu Menningarhúsi á Egilsstöðum á laugardaginn 6. mars. Leikurinn verður sýndur tvívegis fyrri sýningin verður kl.20 og seinni kl.22. Miðasala á sýningarnar er hafin í síma: 899 5715 einnig er hægt að panta miða með því að senda tölvupóst á netfangið mmf@egilsstadir.is

Rétt er að geta þess að aðeins verður um þessar tvær sýningar á Austurlandi að ræða á gamanstykkinu Heilsugæslan.

Gamanleikurinn Heilsugæslan var frumsýndur í október á síðasta ári og hefur notið fádæma vinsælda enda er hér um að ræða efni sem kemur okkur öllum við. Leikurinn hefur verið sýndur yfir 30 sinnum um land allt og notið mikilla vinsælda, fullt hús á hverri sýningu.

Við hrósum okkur yfir háum meðalaldri, þjónustu í hæsta gæðaflokki og frábærum læknum. En er kerfið eins gott og af er látið? Er það hugsanlega farið að vinna gegn tilgangi sínum? Er aukinni eftirspurn sjúkdóma svarað með meira framboði? Hvaða tilgangi þjónar góð heilsa? Metum við líf í magni eða gæðum?

Leikritið, Heilsugæslan, er samið af lækni, Lýð Árnasyni, og gefur áhorfandanum sýn inn í þetta völundarhús og það sem býr að tjaldabaki.

Heilsugæslan er gamanleikur og öll hlutverk í höndum tveggja leikara, þeirra Elfars Loga Hannessonar og Margrétar Sverrisdóttur. Sýningin er ein klukkustund.

Heilsugæslan er hápólitískt leikrit og umfjöllunarefnið brennandi á íslenzku þjóðfélagi, ekki sízt núna, í skugga niðurskurðar.

Heilsugæslan fyrir alla!

» meira

Á laugardaginn hefst Vestfirskur húslestur á nýjan leik eftir nokkurt hlé. Að vanda verður Húslesturinn í Gamla sjúkrahúsinu - Bókasafninu á Ísafirði og hefst lesturinn kl.14. Að vanda verður fjallað um vestfirskan listamann og óhætt er að segja að endurkoma húslestursins sé glæst því Vestfirðingur dagsins verður Aðalsteinn Kristmundsson. Betur þekktur sem Steinn Steinarr. Hann fæddist á Laugalandi í Nauteyrarhreppi 13. október 1908 en flutti síðar í borgina og varð eitt af mestu ljóðskáldum síðustu aldar. Húslesturinn á laugardag verður með hefðbundu húlestrarsniði fjallað verður um skáldið og Elfar Logi Hannesson mun lesa úr verkum Steins Steinarrs. Aðgangur að húslestrinum er ókeypis og öllum opinn.

Vestfirskur húslestur er samstarfsverkefni Kómedíuleikhússins og Bókasafnsins og hófst lesturinn í janúar 2007 þegar fjallað var um þjóðskáldið Matthías Jochumsson. Meðal annarra skálda sem fjallað hefur verið um á Vestfirskum húslestri má nefna Höllu á Laugabóli, Jón úr Vör, Gest Pálsson, Stefán frá Hvítadal og Jakobínu Sigurðardóttur. Húslesturinn á laugardag verður sá fjórtándi í röðinni og örugglega ekki sá síðasti því stefnt er að því að bjóða reglulega uppá húslestra yfir vetrartímann á nýjan leik.

» meira

Tvær aukasýningar verða á Heilsugæslunni á Catalinu í Kópavogi um helgina og rétt er að geta þess strax að það uppselt er á aðra þeirra. Leikurinn hefur verið sýndur nokkrum sinnum á Catalinu fyrir troðfullu húsi og því hefur verið bætt við aukasýningum. Fyrri aukasýningin er á föstudag 12. febrúar kl.21. Uppselt er á seinni aukasýninguna sem er á laugardag. Miðasala er hafin á Café Catalinu í Hamraborg Kópavogi. Miðasölusími er: 554 2166 og miðaverð er aðeins krónur 2.500.-



Um Heilsugæsluna

Við hrósum okkur yfir háum meðalaldri, þjónustu í hæsta gæðaflokki og frábærum læknum. En er kerfið eins gott og af er látið? Er það hugsanlega farið að vinna gegn tilgangi sínum? Er aukinni eftirspurn sjúkdóma svarað með meira framboði? Hvaða tilgangi þjónar góð heilsa? Metum við líf í magni eða gæðum?

Leikritið, Heilsugæslan, er samið af lækni, Lýð Árnasyni, og gefur áhorfandanum sýn inn í þetta völundarhús og það sem býr að tjaldabaki.

Heilsugæslan er gamanleikur og öll hlutverk í höndum tveggja leikara, þeirra Elfars Loga Hannessonar og Margrétar Sverrisdóttur. Sýningin er ein klukkustund.

Heilsugæslan er hápólitískt leikrit og umfjöllunarefnið brennandi á íslenzku þjóðfélagi, ekki sízt núna, í skugga niðurskurðar.

Heilsugæslan fyrir alla!

» meira